रुसले पश्चिमसँग कूटनीति वा मुठभेडमध्ये एउटा रोज्नुपर्ने
एजेन्सि, २९ पौष । अमेरिकी उपविदेशमन्त्री वेन्डी शरमनले रुसले पश्चिमसँग कूटनीति वा मुठभेडमध्ये एउटा रोज्नैपर्ने भन्दै चेतावनी दिएकी छन्। उनले उत्तर एट्लान्टिक सन्धी संगठन नेटो र रुसबीच भएको वार्तापछि त्यस्तो चेतावनी दिएकी हुन् ।
युक्रेनको विषयलाई लिएर देखिएको तनाव घटाउने उद्देश्य सहित ब्रसल्समा नेटो-रुस काउन्सिलको वार्ता भएको थियो । सन् २०१९ यता उक्त काउन्सिलको यो पहिलो भेट भएको हो।
रुसी उपविदेशमन्त्री अलेक्सान्डर ग्रुस्कोले नेटोले मस्कोको मागहरूबारे आफूलाई अनुकूल हुने मागमात्रै सम्बोधन गर्न नसक्ने बताए ।
युक्रेनसँगको सीमा नजिकै दशौँ हजार रुसी फौज एकट्ठा भएका छन् र त्यसले आक्रमणको आशङ्का गराएको छ।
तर उपविदेशमन्त्री शरमनले प्रगति गर्नसकिने क्षेत्रहरू रहेको बताइन् र रुसले अब के चाहन्छ भन्ने निर्णय गर्नुपर्ने बताइन्। उनले अमेरिका र नेटो सबै खालको सम्भावनाका लागि तयारी गरिरहेको बताइन्।
कूटनीतिको शक्ति
वेन्डी शरमनले जबर्जस्ती बैठकलाई ‘कूटनीतिको शक्तिको उल्लेखनीय अभिव्यक्ति’ भनी घोषणा गरेकी छन्। उनले रुसले चुनौती दिएको भन्नेबारे नेटो सदस्यहरूमाझ मुख्य सिद्धान्तको समर्थनमा ‘पूर्ण एकता’ रहेको बताइन्।
विदेशमन्त्रालयले एउटा बलियो साझा स्थान बनाउनका लागि अमेरिकी प्रयासबारे कसैलाई पनि दुविधामा राखेको छैन।
शरमन आफ्ना समकक्षी सेर्गेइ रिब्कोफलाई राम्ररी चिन्छिन्। उनीहरूले यसअघि सिरिया र इरानी हतियार नियन्त्रणका मुद्दामा सँगै काम गरेका थिए।
आठ घन्टा लामो बैठकमा कुनै सम्झौता नभए पनि रिब्कोफले अमेरिकीहरूले रुसी प्रस्तावहरूबारे गहिरो रूपमा अध्ययन गरेको स्वीकार गरे।
रुसले थुप्रै मागहरू जारी गरेको छ जसले नेटोलाई पूर्वतर्फ थप विस्तार गर्न रोक्ने उद्देश्य राखेको छ। आफ्नो सीमा नजिकै नेटोको उपस्थिति घटाउने उद्देश्य पनि रुसको रहेको छ।
नेटोले भने ती मागहरू पूर्ण रुपमा अस्वीकार गरेको छ तर हतियार नियन्त्रण र सैन्य अभ्यास सीमित पार्नेजस्ता अन्य विषयमा भने वार्ता गर्न इच्छुक रहेको जनाएको छ। सन् १९४९ मा स्थापना भएको नेटो प्रतिरक्षाका लागि बनेको गठबन्धन हो र यसमा ३० राष्ट्र सदस्य छन्।
अप्रत्याशित परिणाम
बुधवार ब्रसल्समा भएको वार्तापछि बोल्दै ग्रुस्कोले थप सहकार्यले युरोपेली सुरक्षालाई अप्रत्याशित परिणामहरू दिनसक्ने बताए। उनले नेटोको पूर्वतर्फको विस्तारले आफ्नो देशका लागि अस्वीकार्य खालका खतराहरू पैदा गरेको बताए।
नेटोका प्रमुख यान्स स्टोलटनबेर्गले मस्कोको मागहरूमा केही गर्न नसकिने र त्यसमा युक्रेनको सदस्यतालाई रोक्ने विषय पनि परेको बताए। उनले युरोपमा अझै पनि नयाँ सशस्त्र द्वन्द्वको वास्तविक खतरा रहेको भन्दै चेतावनी दिएका छन्।
सम्बन्धित समाचार
शीर्षकहर
थप
