भारतमा दैनिक नयाँ सङ्क्रमितको सङ्ख्या घट्दै
एजेन्सी, १८ जेठ । भारतको स्वास्थ्य तथा परिवार कल्याण मन्त्रालयका अनुसार भारतमा पछिल्लो २४ घण्टामा कोरोना भाइरसका नयाँ संक्रमितको संख्या १ लाख २७ हजारमा झरेको छ ।
उक्त अवधिमा भारतमा कोरोनाका एक लाख २७ हजार ५१० नयाँ संक्रमित थपिएका हुन् ।
यस अवधिमा भारतमा कोरोना संक्रमणको कारण २ हजार ७९५ जनाको मृत्यु भएको छ । यससँगै भारतमा कोरोनाबाट संक्रमित हुनेको समग्र संख्या २ करोड ८१ लाख ७५ हजार नाघेको छ । हालसम्म भारतमा कोरोना संक्रमणको कारण ३ लाख ३१ हजार ८९५ जनाको मृत्यु भइसकेको छ ।
पछिल्लो २४ घण्टामा भारतको तामिलनाडुमा कोरोनाका २७ हजारभन्दा धेरै नयाँ संक्रमित थपिएका छन् ।
कर्नाटकमा नयाँ संक्रमितको संख्या १६ हजारभन्दा धेरै देखिएको छ भने महाराष्ट्रमा पनि १५ हजारभन्दा धेरै नयाँ संक्रमित थपिएका छन् । भारतमा कोरोनाका संक्रिय संक्रमितको संख्या पनि १८ लाख ९५ हजारमा झरेको छ ।
भारतमा अहिलेसम्म २१ करोड ६० लाख डोजभन्दा धेरै कोरोना खोप मानिसहरुलाई दिइएको छ ।
सम्बन्धित समाचार
शीर्षकहर
थप
