यसरी विश्वकै भविष्य खतरामा पार्ने गरी सल्किएर फैलिरहेको डढेलोमा परेर खरानी भइरहेका बिचरा ती अबोध जीवजन्तुको सङ्ख्या बताउने व्यक्ति चाहिँ अस्ट्रेलियाकै सिड्नी विश्वविद्यालयका जैविक विविधताविद् क्रिस डिकम्यान हुन् ।

पर्यावरण क्षेत्रकै विशेषज्ञको रूपमा रहेका डिकम्यानले उक्त कुरा सन् २००७ मा एक अध्ययन पश्चात् तयार पारिएको रिपोर्टको आधारमा भनेका हुन् । सो रिपोर्ट अस्ट्रेलियाको न्यु साउथ वेल्समा वन फडानीले वन्य जन्तुमा कस्तो असर पर्छ भन्ने बारेमा डब्ल्यू डब्ल्यू एफको लागि तयार पारिएको थियो भने डिकम्यान सोही रिपोर्टका सहलेखक थिए ।

डिकम्यानका अनुसार आगोमा परेर अति भयावह जीवको हत्या भएको छ । अझ दुःखद कुरा त यो छ कि जो प्राणी भागेर संयोगले बाँचेका छन्, पानी र वासस्थानको अभावमा तिनको पनि मृत्यु हुनेवाला छ ।

यतिखेर अस्ट्रेलियाको जङ्गलमा आश्रय लिएर बसेका अनगिन्ती किट पतङ्ग, चराचुरुङ्गी र जीव जन्तुको आम विनाश भइरहेको छ । यो डढेलो अस्ट्रेलियाकै इतिहासमा सबैभन्दा भयानक डढेलो हो भने यो डढेलोमा केवल अस्ट्रेलियाको जङ्गल डढिरहेको छैन । यो डढेलोमा सिङ्गो विश्वको वातावरणीय सन्तुलन डढिरहेको छ, विश्वको भविष्य डढिरहेको छ ।

जब ती बिचरा अबोध प्राणी जीवनको भिख मागेर हताहत भएको देख्छौँ, हामी पनि ती प्राणी जस्तै अनायास आफूलाई निरीह भएको पाउँछौँ, ती प्राणीले जस्तै हामी आफूलाई असहाय भएको पाउँछौँ ।

त्यसो त यो आगलागीमा परेर वास्तवमै कति क्षति भयो, त्यो भने हिसाब गरेर साध्य छैन ।

आगलागीमा परेर टुहुरा बनेका कङ्गारुका एक जोडी बच्चा

यो आम विनाशलाई रोक्न अस्ट्रेलियन सरकार प्रभावकारी ढङ्गले छिटो लागोस् र बाँकी विश्वले यो सङ्कट मोचनको लागि निर्णायक साथ देओस् ।

अस्ट्रेलियाको आगलागीमा ५० करोड जनावर मरे भनेर कसले भनेको हो?

२०७६ पौष २१ गते ६:५६

अस्ट्रेलियाको आगलागीमा परेर ५० करोड जनावर मरेका छन् भनेर लेखिएका समाचार यतिखेर विश्वभर भाइरल बनेको छ । कतिले प्रश्न गरेका छन् कि यो सङ्ख्या कसले गनेको हो?