औद्योगिक विकासको लागि निजी क्षेत्रलाई विश्वासमा ल्याउनु पर्ने मन्त्री बडूको ठोकुवा
काठमाडौँ, ९ जेष्ठ । उद्योग, वाणिज्य तथा आपूर्ति मन्त्री दिलेन्द्रप्रसाद बडूले नेपाल उद्योग परिसंघले आयोजना गरेको कार्यक्रममा सम्बोधन गर्दै उनले निजी क्षेत्रलाई विश्वासमा लिएर औद्योगिक उत्पादन बढाउने बताएका छन् ।
‘निजी क्षेत्र सक्रिय नभइ उत्पादन वृद्धि हुँदैन,’ उनले भने, ‘निजी क्षेत्रलाई विश्वासमा नलिइ मुलुकको आर्थिक विकास सम्भव छैन ।’ त्यसैले आन्तरिक उत्पादन बढाउने र खपत बढाउने गरी वृहत अभियान सञ्चालन गर्ने मन्त्री बडूले बताए । उनले त्यसका लागि २०७९–८९ सम्मको एक दशक लामो अभियान सुरू गर्ने बताए ।
उत्पादन र उपभोगको दशक अभियान सञ्चालन गर्न उद्योगलाई प्रतिस्पर्धी बनाउने र उत्पादन लागत घटाउने योजना उद्योग मन्त्रालयले बनाइरहेको उनको भनाइ छ । यसका लागि कच्चा पदार्थमा अनुदान दिने योजना समेत मन्त्रालयको छ ।
‘स्वदेशमा रोजगारीको अवसर सृजना गर्नका लागि पनि स्वदेशी उत्पादन बढाउनै पर्छ,’ मन्त्री बडूले भने, ‘अर्थतन्त्र उकास्न निर्यातलाई सक्दो बढाउनुपर्छ ।’ यसका लागि सात वटै प्रदेशमा औद्योगिक क्षेत्र र ७५३ वटै पालिकामा औद्योगिक ग्रामको कल्पना गरिएको र त्यसलाई गति दिन नसकिएको उनले स्वीकारे ।
सम्बन्धित समाचार
शीर्षकहर
थप
