विराटनगर, ५ असोज। मोरङमा पोखरीमा डुबेर एकै परिवारका तीन जनाको ज्यान गएको छ ।
ग्रामथान गाउँपालिका–४ बनसखण्डीकी ३५ वर्षीय सीता अधिकारी, उनका १३ वर्षीया पबित्रा र ९ वर्षीया कृतिका छोरीहरुको माछा पाल्ने पोखरीमा डुबेर ज्यान गएको हो ।
छोरीहरु पोखरीमा डुबेपछि उद्धार गर्न गएकी सीताको पनि ज्यान गएको प्रारम्भिक अनुसन्धानका क्रममा खुलेको इलाका प्रहरी कार्यालय बेलबारीले जनाएको छ ।आइतबार दिउँसो माछा पाल्ने पोखरीमा सीताका दुई छोरी पसेका थिए ।

पोखरीको डिलमा कपडा खोलेर दुई छोरी पसेको देखिएको प्रहरीको दाबी छ । गहिरो पोखरीमा दुई छोरीहरु डुबेपछि उद्धारका लागि आमा जाँदा उनी पनि डुबेकी जनाइएको छ ।




