भारतको अपूर्व जित, अस्ट्रेलियाविरुद्धको शृंखला कब्जा

  • Avatar
    admin

    January 19, 21 8:06 am

  • Comments

एजेन्सी, ६ माघ । भारतले अस्ट्रेलिया विरुद्धको चौथो, अन्तिम तथा निर्णायक टेस्ट मंगलबार तीन विकेटले जितेको छ । भारतले जितका लागि ३ सय २८ रनको लक्ष्य पाएको थियो र त्यसलाई ऐतिहासिक रूपमा पछ्याउन सफल रह्यो । साथै, पाहुना टिमले अपूर्व जित निकाल्न सकेको हो ।

Advertisement

भारतले सात विकेट गुमाएर ३ सय २९ रन बनाएका थिए । भारतले चार टेस्टको शृंखला २–१ ले जितेको पनि छ । भारतले अस्ट्रेलिया विरुद्धको पछिल्लो टेस्ट शृंखला पनि जितेको थियो । अस्ट्रेलियालाई बोडर–गावस्कर टेस्ट शृंखला आफ्नो पक्षमा पार्न यो टेस्ट जित्न आवश्यक थियो ।

टेस्टको पाँचौं दिन भारतले बिना विकेटको क्षति चार रनबाट अगाडि खेल्न सुरु गरेको थियो । उसका लागि प्रारम्भिक ब्याट्सम्यान शुभमन गिलले ९१ रन बनाए । यस्तै चेतेश्वर पुजाराले ५६ रन थपे । उनीहरूले दोस्रो विकेटका लागि १ सय १४ रनको साझेदारी गरे र जितको आधार तयार पारे ।

योसँगै ऋषभ पन्तले नटआउट रहेर ८९ रन बनाए । अस्ट्रेलियाले शृंखलाको पहिलो टेस्ट जितेयता भारतले दोस्रो टेस्ट आफ्नो पक्षमा पारेको थियो । तेस्रो टेस्ट बराबरीमा टुंगेको थियो । पहिलो टेस्टको आफ्नो दोस्रो इनिङ्समा ३६ रनमा अलआउट भएर पनि भारतले उत्कृष्ट पुनरागमन गरेका हुन् ।