जापानमा हिउँमा परेर १३ जनाको मृत्यु, सयौं घाइते

  • Avatar
    admin

    January 12, 21 11:29 am

  • Comments

एजेन्सी, २८ पुष । जापानको समुद्र तटीय क्षेत्रमा भएको बाक्लो हिमपातमा परेर कम्तीमा १३ जनाको मृत्यु भएको छ। जापानी अग्नि तथा विपद व्यवस्थापन निकायका अनुसार उक्त घटनामा परेर २५० जनाभन्दा बढी व्यक्ति घाइते भएका छन्। स्थानीय सञ्चार माध्यमले फुकुई प्रिफेक्चरमा ६० देखि ८० उमेर समूहका तीन व्यक्तिको मृत्यु भएको जनाएका छन्।

Advertisement

हिउँदमा आउने विभिन्न प्रकोप सम्बन्धित दुर्घटनामा परेर जापानमा ४७ जना घाइते भएका छन्। यस्तै, निगाता प्रिफेक्चरमा पनि हिउँ फाल्ने क्रममा चारजनाको मृत्यु भएको छ। हिमपातले सर्वाधिक प्रभाव परेका तीनवटा प्रिफेक्चरमा मानिसको उद्धार र सहायताका लागि सेनालाई पनि परिचालन गरिएको छ।

यसबाहेक, हिमपातका कारण सडक यातायात पनि प्रभावित भएको छ। होकुरिकु द्रुतमार्गमा एक हजार २०० भन्दा बढी सवारीसाधन अलपत्र परेका छन्। जापानको मौसम विभाग (जेएमए)ले प्रशान्त महासागरतर्फको पूर्वी क्षेत्रमा मंगलबारसम्म हिमपात हुने जनाएको छ। किन्की, टोकाई र शिकोकु क्षेत्रमा मंगलबार साँझसम्म पहाडी इलाकामा २० सेन्टिमिटरसम्म हिउँ पर्ने बताइएको छ।